Ish-ministri Pal Lekaj dënohet nga Gjykata për keqpërdorim të detyrës zyrtare

Ish-kryetari i Komunës së Gjakovës, Pal Lekaj, që ishte edhe ministër i Infrastrukturës në Qeverinë Haradinaj, është shpallur fajtor nga Gjykata Themelore në Gjakovë, për keqpërdorim detyre, nën akuzën lidhur me subvencionet e shpërndara në këtë komunë.

Pal Lekaj u dënua me burg me kusht prej 1 vit e 6 muaj. Dënimi nuk do t’i ekzekutohet nëse për dy vite ai nuk do të kryejë vepra të tjera penale.

Bashkë me Lekajn u dënuan edhe  Ismet Isufi ish-drejtor për Bujqësi të komunës së Gjakovës dhe  Gani Rama, ish-zyrtar financiar në këtë komunë.

Njëkohësisht Lekajt dhe të tjerëve, iu shqiptua edhe dënimi plotësues që është mos-ushtrimi i funksionit publik për dy vjet si dhe një gjobë në vlerë 69,780 euro, që  t’ia kompensojnë komunës, në afat prej 1 viti. Në zgjedhjet e 14 shkurtit, Lekaj ishte edhe kandidat i AAK-së për deputet.