Nis procesi i vaksinimit në Elbasan, doza e parë u injektohet 80 mjekëve dhe infermierëve

Ministrja e Shëndetësisë dhe Mbrojtjes Sociale Ogerta Manastirliu u shpreh nga spitali i Elbasanit se sot do të vaksinohen 80 mjekë dhe infermierë.

“Kemi filluar procesin e vaksinimit në Elbasan ku sot vaksinohen 80 mjekë dhe infermierë dhe ky do të jetë një pikë vaksinimi që do t’i shërbejë edhe spitaleve bashkiake të Prrenjasit, Librazhdit, spitalet e qarkut Elbasan”, tha Manastirliu.

Ministrja e Shëndetësisë deklaroi se vaksinimi do të vijojë të shtrihet në territor, duke përfshirë edhe mjekët e familjes.

“Vijojmë me vaksinimin në të gjitha qendrat e përqendruara të vaksinimit në territor dhe gjithashtu nga java tjetër fillojmë me vaksinimin sipas protokolleve dhe prioriteteve, të mjekëve të familjes”, tha Manastirliu.

I pranishëm në procesin e vaksinimit ishte edhe kryeministri Edi Rama, i cili përgëzoi bluzat e bardha për punën gjatë pandemisë.

“Ndaj me ju keqardhjen e madhe që disa raste abuzuesish dhe batakçinjsh ju bëjnë pis padrejtësisht të gjithëve, por nuk  e heqin dot vlerën e jashtëzakonshme që ju keni treguar në këtë fazë dhe realisht sakrificën e jashtëzakonshme që po bëni, kështu që kurajo, rezistencë, durim edhe angazhim sepse edhe kjo pjesë e këtyre batakçinjëve do të rregullohet hap pas hapi, kërkon kohën e vet” , tha Rama. 

Më herët, ka pasur procesi i vaksinimit në qytetet si Shkodra, Vlora, Fieri dhe Tirana, ku janë vaksinuar stafe mjekësore dhe të moshuar. 

Lexoni gjithashtu:

”Tipike për diktatorët”, Rama i përgjigjet Metës për vaksinimin e personaliteteve

”Vendi drejt një katastrofe, s’ka transparencë me vaksinat”, Meta kërkon ndryshime në buxhet për shëndetësinë