Projekti i hekurudhës shqiptare, akses edhe për personat me aftësi të kufizuara

Si çdo projekt i ri, edhe projekti i shumëtrumbetuar i “Hekurudhës Shqiptare” është shoqëruar me një hije dyshimi.

Të shqetësuar janë shfaqur së fundmi kategoria e personave me aftësi ndryshe.

“Kam parë që gjithmonë kategoria e personave me aftësi ndryshe harrohen, në infrastrukturat e atyre që rehabilitohen ose ndërtohen nga fillimi. Unë kam parë disa raste në qytetin e Durrësit, që është kërkuar që infrastrukturat ose godinat të kenë përshtatshmëri për personat me aftësi ndryshe, është premtuar dhe është harruar. Unë e ndaj këtë shqetësim duke parë këtë projekt madhor”, thotw Flamur Bala, aktivist.

“Thjesht na është premtuar me fjalë, por nuk na kanë paraqitur ndonjë projekt, ku tregon që godina e re e hekurudhës do të bëhet me rampë, pjerrtësinë e duhur”, shprehet ai.

Që nga infrastruktura e godinës e deri tek trenat dhe tualetet, këto kërkesa përfshijnë gjithçka që u siguron, se shërbimet hekurudhore do të jenë të aksesueshme dhe të përdorshme prej tyre.

Për t’i dhënë një përgjigje zyrtare këtij shqetësimi të ngritur, Euronews Albania iu drejtua me një kërkesë për informacion Hekurudhës Shqiptare. Në përgjigjen e dhënë, kjo e fundit thekson se rehabilitimi i linjës hekurudhore Durrës-Tiranë, si dhe ndërtimi i linjës hekurudhore për në Aeroportin Ndërkombëtar të Rinasit, kanë të përfshira të gjitha hapësirat dhe specifikat e nevojshme për lëvizshmërinë e personave me aftësi të kufizuara.

Sipas përgjigjes, elementet që do të mundësojnë dhe përmirësojnë aksesin për përdoruesit me aftësi të kufizuara janë:

• Ashensorë dhe rampa
• Parmakë në rampa dhe shkallë
• Shenjat me printime të mëdha dhe me prekje braille
• Sistemet e informacionit audio dhe vizuale
• Dritare të aksesueshme të kabinave të biletave
• Shirita paralajmërues në skajet e platformës
• Tualete të aksesueshme

LEXONI GJITHASHTU:

• Hekurudha Tiranë-Durrës, vitin e ardhshëm përfundon projekti
• Kaos në transporte, grevë e hekurudhave në Itali. Në Gjermani bllokohen aeroportet