‘Frika nga pandemia i bëri shqiptarët të duan më shumë Manastirliun’, analistët komentojnë sondazhin në Euronews Albania

Sondazhi i radhës i MRB i prezantuar mbrëmjen e sotme të Euronews Albania zbuloi se nga 16 anëtarët e kabinetit qeveritar të Partisë Socialiste, shqiptarët ndihen të kënaqur më së shumti nga performanca e ministres së Shëndetësisë Ogerta Manastirliu.

Edlira Gjoni, eksperte komunikimi e lidh këtë preferencë të shqiptarëve thjesht me faktin se Manastirliu është ministre e Shëndetësisë në kohë pandemie.

“Është ekspozimi dhe frika e njerëzve që bën ta shohin në mënyrë të tillë nën efektin e frikës”, – u shpreh znj. Gjoni në studion e Ilva Now, ku ishin të ftuar edhe Ergys Mërtiri, sociolog, aktivist; Plator Nesturi, analist dhe Iris Luarasi, pedagoge në Universitetin e Tiranës.

Të njëjtin mendim ndau edhe pedagogia Iris Luarasi, sipas të cilës lajmi i mirë është që shqiptarët kanë shprehur pëlqimin e tyre më të madh për tre ministre gra.

“Duhet të dimë që ka qenë një periudhë që Ministria e Shëndetësisë është hasur me shumë vështirësi dhe titullari mban një barrë të jashtëzakonshme”, – tha znj. Luarasi.

Sipas sociologut Ergys Mërtirit, vlerësimi lidhet edhe me performancën mediatike dhe pozicionimin jopolitik që ka mbajtur ministrja e Shëndetësisë në gjithë këtë periudhë.

“Nuk mund të thuhet e njëjta gjë për Elisa Spiropalin për shembull, që është person shumë i politizuar dhe merr pjesë në debate politike ndaj humb pikë në publik dhe fiton pikë brenda partisë”, – tha z. Mërtiri.

Për analistin Plator Nesturi gjithashtu, vlerësimi për ministren e Shëndetësisë lidhet me periudhën që po kalojmë, ku nga perceptimi publik sipas tij, prevalon fakti i përballimit të suksesshëm.