Dita e Pavarësisë, Nikolla: Shqipëria mes kombeve demokratike e të qytetëruara

Kryetarja e Kuvendit të Shqipërisë, Lindita Nikolla, ka uruar shqiptarët për 111-vjetorin e Pavarësisë së vendit.

Përmes një reagimi në Facebook, Nikolla thotë se Shqipëria është sot mes kombeve të qytetëruara e demokratike, anëtare e NATO-s dhe partnere e SHBA-ve, në mbrojtje të paqes, lirisë, pavarësisë dhe integritetit të kombeve.

Ajo shton gjithashtu se Shqipëria është një mbështetëse e vendosur e Pavarësisë së Kosovës dhe fuqizimit të saj në arenën ndërkombëtare.

Reagimi i Nikollës:

Sot 111-vjetori i shpalljes së Pavarësisë.

Më 28 nëntor 1912, përpjekjet e patriotëve e shqiptarë, të mendjes e të pushkës, u kurorëzuan me sukses me shpalljen e pavarësisë dhe themelimin e shtetit shqiptar të pavarur.

Pasi u ngrit nga Ismail Qemali në Vlorën e Flamurit, flamuri kuq e zi, deri atëherë shenja jonë kombëtare, u bë edhe simboli shtetëror i 🇦🇱 së pavarur.

Ja si e përshkruan këtë ngjarje madhore të historisë kombëtare, Ati Themelues i Shqipërisë së pavarur, Ismail Qemali:

“Plot me gaz e me lot ndër sy, nga mallëngjimi, pra, po dal këtu para jush që t’ju gëzoj me sihariqin e madh, se sot, edhe këtë minutë, Kongresi çpalli mëvehtësinë e Shqipërisë.”

Dhe më poshtë, për të treguar se pavarësia, liria dhe integriteti i shtetit shqiptar, kërkon edhe sakrifica sublime, vijon:

“I drejtoj një lutje Zotit të Madh, që, bashkë me bekimet e Tij që i lipij të na japë për të qenë të denjë të kësaj dite, të pranojë që këtej e tutje të jem unë dëshmori më i parë i Atdheut.”

Fjalë inspiruese të një jete e vepre inspiruese në shërbim të atdheut! Sakrifica është shenja më domethënëse e patriotizmit.

🇦🇱 është sot mes kombeve demokratike e të qytetëruara, anëtare e NATO-s, partnere e denjë e 🇺🇸, që avancon me shpejtësi drejt familjes 🇪🇺, në mbrojtje të paqes, lirisë, pavarësisë dhe integritetit të kombeve.

Një mbështetëse e vendosur e pavarësisë dhe fuqizimit të 🇽🇰 në arenën ndërkombëtare. 🇦🇱

LEXONI GJITHASHTU:

• Të rinjtë nga Presheva zgjedhin Gjirokastrën për studimet e larta: Njerëz mikpritës
• Kim nga Indonezia “ndez” studion në ditën e pavarësisë, këndon “Mora Fjalë”