Kishin ardhur nga Gostivari për festimet, përfshihet në aksident autobusi me nxënës

Një autobuz me targa të Gostivarit, i cili transportonte nxënës shqiptarë nga Maqedonia e Veriut për të marrë pjesë në Festat Kombëtare të 28 dhe 29 Nëntorit në Vlorë e Tiranë, është përfshirë në një aksident.

Bëhet me dije se një autoveturë është përplasur me autobuzin në vendin e quajtur “Kthesat e Murrashit”, pak kilometra në dalje të qytetit të Librazhdit.

Sipas informacioneve paraprake raportohet vetëm për dëme materiale dhe fatmirësisht nuk ka asnjë nxënës të lënduar.

Ende nuk janë të qarta rrethanat e aksidentit, por paraprakisht dyshohet se moti me reshje të dendura dhe mjegull mund të ketë qenë një ndër shkaqet që ka shkaktuar aksidentin.

Ndërkohë në vendin e aksidentit ka shkuar policia dhe autoambulanca.

LEXONI GJITHASHTU:

• Parashuta me flamurin kuq e zi ulet në Prekaz, pamjet nga festimet në Kosovë
• Dita e Pavarësisë bën bashkë Ramën dhe Kurtin, mbahet ceremonia në Vlorë
• Vjosa Osmani uron Ditën e Flamurit: Kosova do të jetë gjithnjë në krah të Shqipërisë