Vjosa Osmani uron Ditën e Flamurit: Kosova do të jetë gjithnjë në krah të Shqipërisë

Presidentja e Kosovës Vjosa Osmani, ka uruar 111 vjetrorin e shpalljes së Pavarësisë së Shqipërisë.

Përmes një postimi në rrjete sociale, Osmani e cilëson 28 Nëntorin si ditën e heronjve të shqiptarëve në të gjitha trojet, duke filluar Gjergj Kastriotit, Ismail Qemali, Hasan Prishtina, Isa Boletini e deri te Adem Jashari, të cilët kontribuan për formimin e shtetit të Shqipërisë dhe Kosovës.

Presidentja Osmani nënvizoi gjithashtu dhe mbështetjen e palëkundur të Kosovës ndaj Shqipërisë.

“Ditën e pavarësisë së Shqipërisë, ditëlindjen e komandantit legjendar Adem Jashari dhe daljen e parë publike të UÇK-së, i bashkon flamuri kuq e zi dhe data 28 nëntor.

Flamuri ynë kombëtar është trashëgimi e përjetësuar në simbol që nga viti 1443 në Krujë, 1912 në Vlorë dhe 1999 në Prishtinë.

Kjo ditë është dedikim për heronjtë tanë që prej Gjergj Kastriotit, Ismajl Qemajlit, Hasan Prishtinës, Isa Boletinit e deri te Adem Jashari, vepra e të cilëve është vula e shtetit të Shqipërisë dhe atij të Kosovës.

Republikës së Shqipërisë ia përcjell urimet më të ngrohta të qytetarëve dhe të institucioneve të Kosovës në këtë 111 vjetor. Kosova do të jetë gjithnjë në krah të Shqipërisë, duke thelluar më tej lidhjet ndërshtetërore, sikurse edhe ato ndërmjet motrave e vëllezërve”, shkruan Osmani.

LEXONI GJITHASHTU:

• Parashuta me flamurin kuq e zi ulet në Prekaz, pamjet nga festimet në Kosovë
• Dita e Pavarësisë bën bashkë Ramën dhe Kurtin, mbahet ceremonia në Vlorë
• Vjosa Osmani uron Ditën e Flamurit: Kosova do të jetë gjithnjë në krah të Shqipërisë