Meta mohon të jetë takuar me persona që kanë probleme me ligjin

Presidenti Ilir Meta mohoi sot të jetë takuar me persona me probleme me ligjin apo se mban kontakte me ish-zyrtarë të drejtësisë të larguar nga procesi i vetingut.

I pyetur nga gazetarja e Euronews Albania, Eksiola Shehu për pretendimet e ngritura nga Sekretari i Partisë Socialiste, Taulant Balla, se Presidenti “vajti fshehurazi në një takim në Librazhd”, Meta u përgjigj se ky pretendim ishte i trilluar.

“I vetmi personazh që ka probleme me ligjin, me të cilin kam foto, është krye-oligarku,” – u përgjigj me ironi Meta duke nënkuptuar kryeministrin Edi Rama, – “E di i gjithë populli i Librazhdit që isha me disa djem dhe familje të shkëlqyera sportdashëse të atij komuniteti.”

Sipas Presidentit akuzat e ngritura nga socialistët janë të qëllimshme duke pasur parasysh situatën përpara zgjedhjeve.

“Më ftoi Taulanti mua dhe s’vajta [në Librazhd], meqenëse e do Presidentin gjithpërfshirës?! Taulantin e nxjerrin vetëm për të sharë e për të provokuar, atë detyrë ka, por unë e di, me 26 prill [pas zgjedhjeve] ai do të bëhet një qytetar që do ta respektojë Kushtetutën dhe institucionet në mënyrë sa më shembullore, por deri atëherë edhe ai të jetë i kujdesshëm,” – vijoi më tej Meta.

Një javë më parë në një intervistë për Euronews Albania, Sekretari i Përgjithshëm i PS-së, Balla, deklaroi se “Meta takohet me prokurorë dhe gjyqtarë të larguar nga vetingu”.

Më 19 shkurt Presidenti Meta u shpreh në një deklaratë se “kushdo që do të mundohet të manipulojë votën nuk ia merr mendja se çfarë do t’i presë”. I pyetur nga gazetarja e Euronews Albania se çfarë nënkuptonte me këtë deklaratë, Meta nuk dha ndonjë koment më të qartë.

Lexoni gjithashtu:

Meta kthen për rishqyrtim zgjatjen e koncesionit të aeroportit të Rinasit

Vlerësimi i Ardian Dvoranit, Meta: E ka nxjerrë Rama, fletë-lavdërimi si ato të Partisë së Punës