Kryeinfermierja heroinë, prej 35 vjetësh iu shërben banorëve të Iballës

Prej 35 vitesh, me çantën e mjekut në dorë, Xhevahire Sokoli çan borën në Malësinë e Iballës, për t’u ardhur në ndihmë banorëve që kanë nevojë për ndihmë mjekësore.

Thellë në malësinë e Fushë-Arrëzit shtrihet njësia administrative Iballë.

Dëbora është një fenomen i zakonshëm për këtë zonë e që në fund të vjeshtës, banorët marrin masat për të siguruar ushqim për dimrin e egër.

Nëse dikur Iballa numëronte më shumë se 400 familje, sot jo më shumë se 80 të tilla banojnë në fshat. Rrugët janë të zbrazëta ndërsa është e vështirë të shikosh këmbë njeriu.

Në hyrje të fshatit, Euronews Albania takoi Xhevahire Sokolin, kryeinfermieren e Iballës. Së bashku me ndihmësen e saj, prej më shumë se tre dekadash kujdesen për shëndetin e banorëve të malësisë duke rrezikuar shpesh herë dhe jetën e tyre .

Një rutinë e tillë përsëritet çdo ditë ndërsa më e vështirë bëhet ndihma kur rrugët pushtohen nga dëbora. Gëzimi më i madh për infermieren është ardhja në jetë e një fëmije , ndonëse ka shumë vite që fshati është shpopulluar .

Të infektuar me COVID-19 ka pasur dhe në Iballë , të cilët infermierja i ka kuruar shtëpi më shtëpi .

Ndonëse sot 58 vjeçe dhe pjesën më të madhe e ka kaluar në shërbim të kësaj zone, nuk njeh pendesë por shprehet se kënaqësia më e madhe është falënderimi i pacientëve të shëruar.

Në ftohtësinë e malësisë së Iballës, na ngrohu thjeshtësia dhe përkushtimi i heroinës 58-vjeçare e cila çdo ditë shërbente me përulësi për ata pak banorë që zgjodhën të mos e braktisin Malësinë.

Lexoni gjithashtu:

Iballa pa qendër shëndetësore, godina është rrënuar edhe pse u ndërtua para 20 vjetësh

Kriza humanitare në Jemen, OKB organizon konferencë donatorësh për të ndihmuar 16 milionë njerëz

Pasaporta e gjelbër e COVID-19 që lejon lëvizjen e qytetarëve, shkakton debate në BE