Vritet 31-vjeçari në Vlorë, Tauland Gjikaj me rekorde kriminale, i shpëtoi burgut tre herë

Një ngjarje e rëndë u shënua mesditën e së mërkurës në qytetin e Vlorës pranë Gjykatës së Apelit ku ka mbetur i vrarë një 31-vjeçar.

Ngjarja ka ndodhur në mes të ditës, ku dëshmitarë okularë kanë treguar se një person i armatosur ka zbritur nga një automjet dhe ka qëlluar mbi viktimën. Ky i fundit është identifikuar si Tauland Gjikaj, person i cili përdorte disa identitete dhe me një të kaluar kriminale brenda dhe jashtë vendit. Në momentin që është qëlluar me armë zjarri, 31-vjecari ka qenë duke ecur në rrugë.

Ende nuk dihen shkaqet e krimit, ndërkohë që policia ka njoftuar se është ndaluar një person me iniciale H.J, 44 vjeç si dhe automjeti që është përdorur në vrasje. në brendësi të tij është gjetur edhe një arme kallashnikov. Po ashtu një tjetër person është shpallur në kërkim, I dyshuar si bashkëpunëtor në vrasje.

Tridhjetenjëvjeçari i ekzekutuar rezulton i përfshirë në një përplasje me armë në Vlorë në shkurt të vitit 2018. Ngjarja e tre viteve më parë ndodhi në lagjen “28 Nëntori”, pranë Kishës Ortodokse në Vlorë.

Në muajin Mars ndaj Gjikës ndryshoi masa e sigurisë nga “arrest me burg” në arrest shtëpie. Edhe pse ishte në arrest shtëpiak ai u kap nga policia e Vlorës pak muaj më vonë, konkretisht në qershor të vitit 2018, duke lëvizur me armë në makinë.

Policia njoftoi se ishte arrestuar Taulant Manaj, një prej mbiemrave që përdorte viktima i atentatit të sotëm. Pas arrestimit në muajin qershor për armëmbajtje pa leje, gjykata e la sërish në arrest shtëpie.

Lexoni gjithashtu:

Ekzekutohet 31-vjeçari në Vlorë, pranga autorit të dyshuar