Sulmi në Veri, ish-pjesëtari i UÇK: Si Serbia dështoi ta fuste në kurth Kosovën

Eksperti Dritan Goxhaj është shprehur se Serbia tentoi ta fuste në kurth Kosovën përmes sulmit të kryer nga një grup terroristësh në Veri, ku mbeti i vdekur edhe një efektiv policie.

Teksa ishte i ftuar në Euronews Albania, Goxhaj tha se plani ishte që Policia e Kosovës të futej në manastir dhe terroristët do të vrisnin të pranishmit që ishin atje, duke pretenduar se kjo do të ishte një vepër e Kosovës.

Ai tha se nëse plani do të arrihej, do të kishte një bllokadë diplomatike për Kosovën dhe një numër të madh ç’njohjesh.

“U bë disa orë luftë jashtë manastirit dhe ata pretenduan se gjoja u tërhoqën. Por me armatimin që ata kishin dhe me armatimin që kishte Policia e Kosovës, ata nuk mund të tërhiqeshin.

Ishte strategji që duke u futur në manastir, Policia e Kosovës pas dy orëve luftë të ndërhynte në manastir dhe pas kësaj ndërhyrje ata që ishin në manastir do ti ekzekutonte vetë Serbia dhe do të thoshte urdhëro çfarë bëri Kosova. Në rast se do e bënte do të kishim një sulm që do të konsiderohej edhe si sulm fetar sepse myslymanët po godasin një objekt fetar ortodoks.

Kështu do të niste një seri veprimesh të tjera ndërkombëtare që do të çonte në ç’njohjen e Kosovës nga ato vende ortodokse kryesisht të Europës, duke i krijuar një bllokadë diplomatike totale Kosovës. Por pjekuria e Policisë së Kosovës nuk e lejoi këtë”, tha Goxhaj.

LEXONI GJITHASHTU:

• Sulmi në Veri, ministri Svelça publikon prova dhe foto: Lidhja me djalin e Vuçiçit
• Knaus: Sulmi në veri, përpjekje e Serbisë për të ndryshuar kufijtë me forcë