Udhëtimi i parë pa viza nga qytetarët e Kosovës, Kurti: U hoq një padrejtësi

Ditën e sotme qytetarët e Kosovës do të mund të lëvizin pa viza në vendet e zonës Shengen në BE.

Ndërkohë, kryeministri i Kosovës, Albin Kurti I ka uruar qytetarët nga aeroporti Ndërkombëtar i Prishtinës “Adem Jashari”.

Para mediave, Kurti tha se sot do të udhëtojnë për në Vjenë 50 qytetarë, të cilët e kanë fituar këtë mundësi në kuadër të fushatës së Qeverisë.

“Kemi pritur shumë gjatë, nga sot po hiqet një padrejtësi. Qytetarët tanë tashmë do të mund të lëvizin në 32 vende. Sot do të udhëtojnë për në Vjenë 50 qytetarë të cilët kanë fituar këtë mundësi në kuadër të fushatës tonë. Të respektojnë kriteret, dhe kudo që të udhëtojmë mos të harrojmë se shtëpia jonë është Kosova. Urime viti i ri dhe për herë të fundit urime liberalizimi i vizave”, tha Kurti.

Kujtojmë se Komisioni Evropian ka vlerësuar që nga korriku i vitit 2018, se Kosova i ka përmbushur të gjitha standardet e Udhërrëfyesit për Liberalizimin e Vizave.

Por vendimi ishte shtyrë për shkaqe politike dhe arsye të tjera brenda BE.

LEXONI GJITHASHTU:

• Qytetarët e Kosovës pa viza në Europë, Begaj: Arritje e merituar, por e vonuar!
• Pritjes i erdhi fundi, nga sot qytetarët e Kosovës do të lëvizin pa viza në BE