Pritjes i erdhi fundi, nga sot qytetarët e Kosovës do të lëvizin pa viza në BE

Pas pritjes së gjatë, nga dita e sotme qytetarët e Kosovës do të udhëtojnë pa viza nëpër vendet e Bashkimit Evropian.

Shqiptarët e Kosovës nuk do të presin më para zyrave të ambasadave të huaja për një vizë, e as nuk do të shpenzojnë për termine e pagesë vizash.

Qeveria e Republikës së Kosovës në kuadër të fushatës informuese, organizon udhëtimin e parë pa viza për fituesit me fat nga kuizi i BE-së.

Sipas mediave në Kosovë, mësohet se kryeministri Albin Kurti dhe zëvendëskryeministrja, njëherësh ministrja e Punëve të Jashtme dhe Diasporës, Donika Gërvalla-Schëarz, do të qëndrojnë në Aeroportin “Adem Jashari” për t’i uruar dhe përshëndetur qytetarët e parë që do të udhëtojnë pa viza.

Kurti e Gërvalla do të mbajnë konferencë për media më vonë, lidhur me këtë ngjarje kaq të rëndësishme për Kosovën.

Kujtojmë se Komisioni Evropian ka vlerësuar që nga korriku i vitit 2018, se Kosova i ka përmbushur të gjitha standardet e Udhërrëfyesit për Liberalizimin e Vizave. Por, për shkaqe politike dhe reflektime të brendshme, vendimi ishte shtyrë.

Vendimi për liberalizimin e vizave për Kosovën u botua të martën e 25 prillit në Gazetën Zyrtare të Bashkimit Evropian. Me këtë veprim u përmbyll edhe formalisht i gjithë procesi i liberalizimit të vizave për qytetarët e Kosovës. Vendimi pritej të hyjë në fuqi më 1 janar të vitit 2024, për të gjithë qytetarët e Kosovës që posedojnë pasaporta biometrike të lëshuara nga shteti i Kosovës.

Shtetet që përfshihen në vendimin për liberalizimin e vizave për qytetarët e Kosovës janë: Austria, Belgjika, Bullgaria, Kroacia, Qipro, Republika Çeke, Danimarka, Estonia, Finlanda, Franca, Gjermania, Greqia, Hungaria, Italia, Letonia, Lituania, Luksemburgu, Malta, Holanda, Polonia, Portugalia, Rumania, Sllovakia, Sllovenia, Suedia, Zvicra, Norvegjia, Lihtensteini dhe Islanda.

Komisioni Evropian në vendimin për liberalizim kishte sqaruar se qytetarët e Kosovës nuk do të mund të udhëtojnë në Spanjë, vend që nuk e njeh as pavarësinë e Kosovës, as pasaportat e saj.

• LEXONI GJITHASHTU:
• Udhëtimi i parë pa viza nga qytetarët e Kosovës, Kurti: U hoq një padrejtësi
• Qytetarët e Kosovës pa viza në Europë, Begaj: Arritje e merituar, por e vonuar!