Japoni/Në garë me kohën, skuadrat e shpëtimit nxitojnë për të mbijetuarit e tërmetit

Skuadrat e shpëtimit në Japoni janë në garë me kohën për të gjetur të mbijetuar të tërmetit 7.6 ballë të së hënës, që ndodhen nën rrënojat e godinave.

Autoritetet në Ishikaua bënë të ditur se 180 persona konsiderohen të humbur, përfshirë një 13-vjeçar.

Kryeministri Fumio Kishida u bëri thirrje institucioneve përkatëse që ta trajtojnë shpëtimin e jetëve me prioritet.

“Ka ende shumë njerëz të bllokuar poshtë godinave të shembura që presin ndihmë. Ne do të shtojmë të gjitha përpjekjet në terren për të shpëtuar sa më shumë njerëz”, tha Fumio Kishida, kryeministër i Japonisë.

Rreth 30 mijë banesa në prefekturën Ishikaua kanë mbetur pa energji, ndërsa mbi 110 mijë shtëpi të tjera në prefekturat Tojama dhe Nigata janë pa ujë të pijshëm.

Që nga mëngjesi i së enjtes, me orën lokale, në zonat në fjalë janë regjistruar thuajse 600 lëkundje.

Autoritetet kanë paralajmëruar se reshjet e shumta mund të rrisin rrezikun për rrëshqitje toke.

LEXONI GJITHASHTU:

• Aksidenti tragjik në Japoni/ Pilotët: Nuk e pamë avionin tjetër deri kur u përplasëm
• Pse tërmeti në Japoni shkaktoi vetëm 0,1% të viktimave të atij në Turqi?