I përfshirë në grup të strukturuar kriminal dhe drogë, ekstradohet nga Franca ‘Bebi’

Është ekstraduar nga Franca drejt Shqipërisë një 52-vjeçar, i akuzuar për veprat penale “Trafikimi i narkotikëve”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Si rezultat i bashkëpunimit të Interpol Tiranës me Interpol Lyon, Francë, është ekstraduar nga Franca, shtetasi shqiptar F. Xh., banues në Fier.

Ky shtetas, në bashkëpunim me shtetas të tjerë, të organizuar në formën e grupit të strukturuar kriminal, dyshohet se është përfshirë në trafikun e lëndës narkotike heroinë, duke e transportuar mes Greqisë, Shqipërisë, pjeserisht edhe në Maqedoninë e Veriut.

Nga hetimet me metoda speciale, ky shtetas 52-vjeçari dyshohet të jetë përfshirë në tri episode të ndryshme të kësaj veprimtarie kriminale, gjatë vitit 2016, dy prej të cilave kanë mbetur në tentativë.

Nga hetimet dhe veprimet e bashkërenduara midis autoriteteve gjyqësore shqiptare dhe atyre greke është bërë i mundur sekuestrimi i rreth 27 kg heroinë.

I përfshirë në këtë veprimtari kriminale, ai kishte pseudonimin “Bebi”.

Shtetasi i ekstraduar iu dorëzua Drejtorisë së Përgjithshme të Burgjeve, për veprime të mëtejshme.

LEXONI GJITHASHTU: 

• Tërmet në Greqinë veriore, lëkundjet ndihen dhe në jugun e Shqipërisë
• Shumica e shqiptarëve nuk i çojnë fëmijët në aktivitete kulturore