9 persona humbin jetën nga përmbysja e autobusit në Turqi

Nëntë persona humbën jetën dhe 30 të tjerë u plagosën në Turqi kur një autobus ndërqytetës u përmbys pranë qytetit të Mersinit.

Në mesin e viktimave janë edhe dy fëmijë, ndërsa aksidenti ka ndodhur kur drejtuesi i mjetit ka humbur kontrollin e mjetit, njoftojnë autoritetet.

Autobusi Dilmenler Mardin, i cili po udhëtonte nga Marmaris në Mardin, goditi një gardh dhe u përmbys në dalje të tunelit Yenikaş në autostradën D-400.

Guvernatori i Mersinit, Ali Hamza Pehlivan tha se aksidenti ka ndodhur mëngjesin e sotëm rreth orës 01.15. në rrugën Mersin-Antalia, 170 kilometra nga qendra e qytetit, transmeton agjencia Anadolu.

“Aksidenti tragjik i trafikut ndodhi kur autobusi i pasagjerëve, i cili po lëvizte në drejtim të Mersinit me 40 pasagjerë dhe 3 shoferë, u përmbys në dalje të tunelit Sariyar për shkak se shoferi humbi kontrollin e timonit”, tha guvernatori.

Ai shtoi se 13 të lënduar janë në gjendje të rëndë dhe se hetimet janë duke vazhduar.

Pehlivan tha se pamjet e kamerave të vëzhgimit tregojnë se autobusi hyn në kthesë me shpejtësi të madhe, godet një gardh dhe bie në një kanal.

Shoferi ka humbur kontrollin në kthesë në dalje të tunelit, me shumë gjasa për shkak të shpejtësisë së papërshtatshme”, shtoi Pehlivan dhe deklaroi se rruga ishte e rrëshqitshme për shkak të reshjeve të shiut dhe se më shumë detaje do të dihen pas përfundimit të hetimeve.