“Tkurret” tregtia e jashtme/ Në 2023 shitëm 440 mld lekë mallra, 10% më pak se 2022

Tregtia e jashtme u tkurr vitin e kaluar. Të dhënat tregojnë se nga eksportet, Shqipëria fitoi 440 mld lekë, ose 10% më pak se në vitin 2022.

Bilancet tregtare që dalin në shifrat zyrtare të eksporteve në vitin 2023, tregojnë se Shqipëria ka shitur mallra me vlerë 440 mld lekë.

Në krahasim me vitin 2022, të ardhurat janë tkurrur me 10% ose 47 mld lekë më pak, ndërsa rënia duket të jetë, më e lartë edhe se në vitin 2020, kur tregjet u bllokuan për shkak të mbylljes së kufijve nga pandemia.

Shifrat, po ashtu tregojnë se produkti shqiptar i çuar jashtë nuk është tkurrur, por humbjet rezultojnë të kenë ardhur kryesisht nga zhvlerësimi i monedhave të huaja, si euro, dollari e paundi.

Partneri kryesor tregtar ishte Italia edhe gjatë vitit të kaluar, me të cilën kemi eksportuar 189 mld lekë mall, ndjekur nga Kosova, Greqia, Gjermania e Spanja nga të cilat kemi marrë së bashku 112 mld lekë.

Ndërkohë, edhe importet kanë rënë me 8%, ku Shqipëria pagoi 873 mld lekë për të blerë mallra nga jashtë.

Edhe në këtë drejtim Italia është vendi që na furnizon masivisht aty ku kemi paguar 194 mld lekë, ndjekur nga Kina dhe Turqia me rreth 90 mld lekë secila.

LEXONI GJITHASHTU:

• Rritje ekonomike 3.2% në 2024, BB: Në Shqipëri do ndikojë turizmi dhe projektet
• Hapet ankandi Fotovoltaik hibrid 300 MW/ Balluku moment i artë për ekonominë