Kosova raporton shifra të larta infektimesh me Covid-19

Pandemia e Covid-19 në Kosovë vijon të mbetet shqetësuese sa i përket numrit të personave të infektuar.

Instituti Kombëtar i Shëndetit Publik raporton se pesë qytetarë të prekur me coronavirus kanë ndërruar jetë në orët e fundit, kurse nga 4291 teste të kryera, 704 prej tyre janë konfirmuar pozitivë.

Autoritetet kosovare thonë se deri tani kanë ndërruar jetë si pasojë e virusit 1736 qytetarë, shifër kjo e lartë nëse krahasohet me numrin e të infektuarve.

Kryeqytetit i vendit, Prishtina është prekur më shumë nga pasojat e  Covid-19, ku vetëm në orët e fundit janë konfirmuar 265 raste të reja infektimesh.

Teksa vendet e tjera të rajonit vijojnë përpjekjet për të shtuar dozat e vaksinave kundër Covid-19, Kosova deri tani nuk ka bërë asnjë hap në këtë drejtim.

Autoritetet shtetërore ende nuk kanë afat të qartë se kur do mund të sigurojnë doza vaksinash, me qëllim nisjen e injektimit të tyre në kategoritë, që janë më të rrezikuara.