Përkeqësohet situata e motit në qarkun e Elbasanit, dhjetëra fshatra pa energji

Moti i keq që që ka mbizotëruar ditën e sotme edhe në 7 bashkitë e Qarkut të Elbasanit, ka krijuar probleme të shumta në furnizimin me energji elektrike, në shumicën e fshatrave malorë të bashkive Elbasan, Prrenjas, Gramsh e Librazhd.

Në këto zona, era e fortë dhe reshjet e dendura të dëborës kanë dëmtuar pjesë të konsiderueshme të rrjetit shpërndarës të energjisë elektrike si edhe mjaft shtylla të tensionit të mesëm, duke lënë pa energji disa fshatra.

Trashësia e dëborës mbrëmjen e kësaj të shtune në disa fshatra malorë të këtij qarku ka arritur të paktën 40 cm.

Në Bashkinë e Librazhdit për shkak të trashësisë së madhe të dëborës janë bllokuar rrugët në fshatin Kostenjë në Njësinë Administrative Lunik, në Qafë Dardhë, në Njësinë Adminitrative Polis, në Qarrishtë në Njësinë Administrative Qendër, në Lagjen Mali i Xhyrës të Njësisë Administrative Hotolisht.

Në bashkinë e Librazhdit segmenti i rrugës Lunik-Steblevë aktualisht i kalueshëm vetëm me zinxhirë.

LEXONI GJITHASHTU:

• Moti i keq| Rama: 1500 punonjës të OSSH në terren, ARRSH mobilizon grupet e punës
• Moti i keq, ministri Peleshi: Këto janë qarqet problematike dhe akset e bllokuara