U plagos nga rënia e skelës, 38-vjeçarja është gruaja e ish-futbollistit të njohur

Rrëzimi i një skele nga një pallat në ndërtim i firmës Arlis plagosi dy kalimtarë ditën e djeshme. Mes të plagosurve është edhe bashkëshortja e ish-futbollistit të njohur, Bledi Shkëmbit, Imelda.

Ajo ka qenë duke kaluar poshtë godinës 9-katshe, së bashku me babain e saj Hysen Lavdari, kur u goditën nga skela metalike.

Lidhur me këtë ngjarje policia ka arrestuar inxhinierin, sipërmarrësin dhe 1 punëtorë të pallatit në ndërtim në Tiranë.

Elton Osmanllari, Erjon Kanto dhe Zef Kalaj janë personat e arrestuar nga policia. I pari me profesion punëtor ndërtimi, i dyti sipërmarrësi i punimeve në objekt dhe personi i tretë është inxhinieri.

“Specialistët për Hetimin e Krimeve të Komisariatit të Policisë Nr. 2, në vijim të veprimeve hetimore të kryera për ngjarjen e ndodhur ditën e djeshme, në bulevardin “Gjergj Fishta”, ku nga një pallat në ndërtim e sipër, ra një skelë që dëmtoi dy kalimtarë, arrestuan shtetasit:

E. O., 41 vjeç, E. K., 41 vjeç dhe Z. K., 49 vjeç, të tre banues në Tiranë, të punësuar respektivisht punëtor ndërtimi, sipërmarrës dhe inxhinier, në firmën që kryente punimet për ndërtimin e pallatit.

Ditën e djeshme, në orën 10:00, në bulevardin “Gjergj Fishta”, dyshohet se për shkak të mosrespektimit të rregullave të sigurimit teknik në punë, nga kati i 13-të i pallatit në ndërtim, ka rënë një skelë metalike që dëmtoi 2 kalimtarë të rastit, shtetasit I. Sh., 38 vjeçe dhe H. L., 72 vjeç, të cilët ndodhen jashtë rrezikut për jetën”, thuhet në njoftimin e policisë.

LEXONI GJITHASHTU:

• E trishtë| Shqiptari bie nga skela në Itali, ndërron jetë në vend
• E trishtë/ Punëtori shqiptar bie nga skela në asfalt, ndërron jetë në vendngjarje