Sot konstituohet kuvendi i Kosovës, juristi Hodaj: Deri në maj Vjosa Osmani do jetë presidente në detyrë

Ditën e sotme konstituohet kuvendi i Kosovës dhe Glauk Konjufca pritet të zgjidhet kryetar i parlamentit dhe si nënkryetar është propozuar Kujtim Shala.

Për konsitutimin e institucioneve, juristi Taulant Hodaj u shpreh në Euronews Albania se Kushtetuta e Kosovës nuk e përcakton se kush duhet të zgjidhet i pari presidenti apo kryeministri.

“Kushtetuta e Kosovës nuk e përcakton se kush do të zgjidhet i pari, por këtu ne kemi një situatë ku kemi mungesë të presidentit, kemi president në detyrë dhe kryeministër në detyrë”, tha ai.

Ai u shpreh më tej se fillimisht pritet të zgjidhjet kryeministri dhe më pas presidenti.

Sa i përket presidentit në detyrë në Kosovë, zoti Hodaj tha se mandati i këtij posti është 6 muaj.

Zoti Hodaj theksoi se Vjosa Osmani do të vazhdojë të ushtrojë detyrën e presidencës deri rreth datës 5 maj, duke iu referuar Kushtetutës.

Ai beson se shumë shpejt në Kosovë do të zgjidhet presidenti i ri dhe këtë post mund ta mbajë sërish Vjosa Osmani.

Lexoni gjithashtu:

Konstituimi i institucioneve, Kurti e Osmani vijojnë takimin me kreun e LDK-së

Zgjedhja e presidentit, Abdixhiku takohet sot me Osmanin dhe Kurtin