Irani dërgon tre satelitë në orbitë

Irani tha se ka lëshuar njëkohësisht tre satelitë në orbitë më 28 janar. Ky njoftim vjen pothuajse një javë pasi lëshimi i një sateliti kërkimor nga Garda Revolucionare e Iranit nxiti kritika nga Perëndimi.

“Për herë të parë, tre satelitë me sukses janë dërguar në orbitë”, raportoi televizioni shtetëror iranian.
Satelitët u bartën nga bartësi i satelitëve Simorgh, dhe më pas u lëshuan në një orbitë minimale prej 450 kilometrash, shtoi televizioni shtetëror.

Sateliti Mahda, që peshon rreth 32 kilogram dhe u zhvillua nga Agjencia e Hapësirës së Iranit, është dizajnuar të testojë nënsistemet e avancuara satelitore, tha agjencia shtetërore e lajmeve, IRNA.

Dy satelitët e tjerë, Kayhan 2 dhe Hatef, peshojnë më pak se 10 kilogramë secili dhe synojnë të testojnë teknologjinë në hapësirë dhe komunikimin e brezit të ngushtë, tha IRNA.

Javën e kaluar, Garda Revolucionare e Republikës Islamike dërgoi në hapësirë satelitin kërkimor, Soraya.
Britania, Franca dhe Gjermania dënuan këtë veprim, duke e cilësuar Iranin si “intervencionist”.

Qeveritë perëndimore, përfshirë atë të Shteteve të Bashkuara, vazhdimisht kanë paralajmëruar Iranin kundër lëshime të tilla, duke thënë se teknologjia e njëjtë mund të përdoret për raketa balistike, përfshirë edhe ato që janë të dizajnuara për të bartur koka bërthamore.

LEXONI GJITHASHTU:

• Irani mohon se SHBA e paralajmëroi për sulmin vdekjeprurës nga IS
• Turqia dhe Irani: Të shmangim përshkallëzimin e tensioneve në Lindjen e Mesme