Grida Duma tregon çfarë bëri pas sulmit me foto nga kryeministri Rama

Ish-deputetja e Partisë Demokratike Grida Duma tregoi për gazetaren Ilva Tare në Euronews Albania se nuk ishte shqetësuar aspak pas publikimit të fotos që shumëkush e cilësoi denigruese të znj. Duma, teksa shpaloste kandidatët e PS për zgjedhjet e 25 prillit.

Znj. Duma u shpreh se është indiferente kur e di se përballë ka një njëri nga i cili nuk ka pritshmëri të tjera dhe të cilit siç tha, nuk mund t’i kërkosh të ndryshojë kur ka arritur një farë moshe dhe treçerekun e gabimeve i ka bërë me vetëdije të plotë.

“Unë bëj pjesë në politikën shqiptare dhe e di se kë kam përballë. Siç e dhe e kam mësuar të vazhdosh të mbash kostot e një Shqipërie që është shumë larg të qenurit demokratike dhe njerëzore nga pikëpamja politike. Nuk më ka shqetësuar, shikoja mesazhet dhe nuk pata fare kuriozitetin të shihja çfarë kishte publikuar. Unë largoj nga vetja çdo gjë që më bezdis”, tha znj. Duma.

Kandidati i LSI, Edmond Haxhinasto e cilësoi të papranueshme gjuhën që sipas tij po përdoret nga mazhoranca në këtë fushatë zgjedhore, teksa theksoi se dhuna verbale dhe fizike sipas tij, është qëllim për t’u larguar nga llogaridhënia para popullit.