KE reagon për Euronews Albania: Nuk ndërhyjmë në fushatë

Zyra e shtypit e Komisionit Evropian në Bruksel saktësoi sot për Euronews Albania se takimet ku shfaqen komisionerë europianë nuk lidheshin me përfshirjen e tyre në kahet politike të zgjedhjeve të 25 prillit.

Në një reagim për redaksinë tonë të lajmeve, zëdhënësja për shtyp e KE, Ana Pisonero theksoi se aktiviteti i sotëm ishte në nivel rajonal dhe nuk lidhej me një event të organizuar nga Partia Demokratike.

[
cite_header=Komisioni nuk komenton mbi komentet e palëve të treta. Lutemi të keni parasysh që Komisionerja Mariya Gabriel mori pjesë në Tryezën e Rrumbullakët të datës 18 mars mbi Arsimin me ftesë të Universitetit Modul të Vjenës i cili është organizatori i këtij eventi. Pjesëmarrja e komisioneres ishte e kufizuar vetëm në dhënien e një fjalimi kryesor.
cite_author=Ana Pisonero
cite_description=Zëdhënëse e KE
]

Euronews Albania u interesua lidhur me reagimin e Komisionit Evropian pasi kryeministri Rama ngriti shqetësimin se figurat e institucioneve të BE po përdoreshin për fushatë duke ndërhyrë në frymën elektorale të një vendi kandidat si Shqipëria.

Dikush në Bruksel duhet t’u thotë komisionerëve që harxhojnë kohën e punës së paguar nga taksat e popujve të Europës, për të bërë videomuhabete elektorale me Lulëzim Bashën, se kjo quhet ndërhyrje në fushatën e brendshme elektorale të një vendi kandidat për në BE!

— Edi Rama (@ediramaal) March 23, 2021

Rama iu referua një postimi të kryetarit të Partisë Demokratike Lulzim Basha në Facebook ku transmetoi nga selia e PD një konferencë për arsimin të përkthyer në shqip, me mbishkrimin “#LulzimBasha – Takim online me Komisioneren e BE Mariya Gabriel dhe përfaqësues të Universitetit Modul të Austrisë #ShqipëriaFITON“.

“Fjalimi, i cili është i publikuar në faqen e internetit të Komisionit, është i fokusuar mbi iniciativat e fundit evropiane në fushën e arsimimit dhe të kërkimit, të cilat vlejnë për të gjithë rajonin e Ballkanit Perëndimor, përfshirë Shqipërinë. Komisionerja nuk bëri ndonjë deklaratë për ndonjë parti politike, por mbajti një fjalim mbi çështjet që kishin të bënin me fushën e saj”, thuhet në reagimin e Komisionit Evropian për Euronews Albania.