Hetimet e SPAK për sterilizimin, mjeku Koni: Pashë frymë pozitive, prokurorët do i shkojnë çështjes deri në fund

Struktura e Posaçme Kundër Korrupsionit ka nisur marrjen e dëshmive për denoncimin e abuzimeve me koncesionin e sterilizimit. Mjeku, Artan Koni, një nga denoncuesit kryesor të kësaj kontrate të Partneritetit Publik-Privat, i ftuar në studion e Ilva Now, foli për atë që ka deklaruar para prokurorëve të SPAK.

“U thirra për të pasuruar atë kallëzim që kam bërë disa muaj më parë, pasi prokurorët nuk janë të fushës dhe kërkuan më shumë informacion lidhur me procedurën dhe koston e sterilizimit. Shpresoj që të kem dhënë kontributin tim. Pashë një frymë pozitive dhe më ndjell se hetimit do t’i shkohet deri në fund”, u shpreh z. Koni.  

Koncesioni i sterilizimit, sipas mjekut sjell një kosto prej 17 milionë euro në vit për taksapaguesit, pasi për një set kirurgjikal që kostoja e sterilizimit para PPP-së ishte 2.4 euro, tani paguhen 190 euro.

“Nëse kemi një përmirësim të sterilizimit që sipas Ministrisë së Shëndetësisë është në 22%, me një rritje me 80% të kostos, atëherë ka një problem”, tha mjeku urolog.

I pyet nga gazetarja, Ilva Tare nëse ka besim te sistemi i ri i drejtësisë, Koni tha se, mbetet optimist nisur nga fakti se SPAK ka filluar hetimet vetëm një muaj pas kallëzimit.

“Kam besim sepse shoh që ka një frymë pozitive. Ishte SPAK-u që bëri të ditur se kishte nisur hetimet, pasi dhe mund të mos e fillonte fare. Ka vetëm një muaj nga kallëzimi dhe ata shohin se është një çështje që ka rëndësi”, tha z. Koni.

Kallëzimi i PPP-së së sterilizimit u dorëzua në SPAK nga Nisma “Thurje” më 23 dhjetor, duke u shënuar si padia e parë që i adresohej këtij institucioni të drejtësisë së re.