PS nis fushatën, Rama: Duam mandatin e tretë që Shqipëria të mos kthehet mbrapa

Partia Socialiste ka hapur zyrtarisht fushatën e saj elektorale për zgjedhjet parlamentare të 25 prillit.

Ajo ka zgjedhur sheshin “Skënderbej” në Tiranë, për të shpalosur premtimet para mbështetësve, ndonëse për shkak të masave anti-Covid nuk do lejohet grumbullimi masiv i qytetarëve.

Kryetari i Partisë Socialiste, Edi Rama, gjatë fjalës së tij tha se kërkon një mandat të tretë, me qëllim çuarjen përpara të reformave të nisura.

“Mandati i tretë i PS nuk është një qëllim në vetvete, mandati i tretë i PS, nuk është për PS dhe për ata që PS e përfaqësojnë si deputetë, ministra, kryetarë bashkish, mandati i tretë i PS nuk është për karrigen e askujt, por mandati i tretë është që Shqipëri të mos kthehet kurrë mbrapa. Mandati i PS bën të pakthyeshme të gjitha reformat, e kundërta do të thotë humbje e të gjithë përpjekjeve dhe sakrificave dhe kthim me siguri, aty ku Shqipëria nuk duhet të kthehet më”, tha ai.

Ai kritikoi mitingun e Partisë Demokratike pasi sipas Ramës nuk respektuan rregullat e vendosura kundër Covid-19.

“Unë besoj që në këtë sfidë ne kemi mundësinë të bëjmë një dallim shumë të madh, një dallim shumë të madh që po e bëjmë edhe sonte. Praktikisht, sonte, ne dhe ata, u kemi vënë para syve njerëzve dy kartolina, në një ekran televizori të ndarë dhe mjafton të shohësh dy kartolinat për të kuptuar edhe pa dëgjuar shumë, ndryshimin e madh që ndan ne dhe ata”, u shpreh Rama.

Komisioni Shtetëror i Zgjedhjeve ka kërkuar nga partitë politike të tregojnë vetëpërmbajtje dhe maturi pasi zgjedhjet bëhen për qytetarët.