Norvegjia proteston në fushë, skandali me punëtorët që ndërtojnë stadiumet për Katar 2022

Norvegjia luajti të mërkurën kundër Gjibraltarit në kualifikuesen e parë drejt Botërorit 2022, por ndeshja nisi me një protestë kundër shfrytëzimit të emigrantëve në Katar për ndërtimin e impianteve që do të presin Kupën e Botës.

Kombëtarja e Norvegjisë e nisi të mërkurën rrugëtimin e saj për Kualifikueset e Botërorit “Katar 2022” ndaj ekipit të Gjibraltarit, duke fituar me rezultatin 3-0.

Para fillimit të ndeshjes lojtarët e kombëtares nordike, protestuan ndaj kushteve ç’njerëzore të punonjësve të kontraktuar për ndërtimin e komplekseve dhe stadiumeve në shtetin e gjirit persik.

Të gjithë lojtarët, përfshi edhe sulmuesin e Borusia Dortmund, Erik Haland mbanin veshur fanella ku shkruhej, “të drejtat e njeriut, brenda dhe jashtë fushës.”

Sipas një hetimi të mediave britanike, 6500 punonjës të huaj kanë humbur jetën në aksidente gjatë orarit të punës, që nga viti 2010-të, kur Katari u shpall kandidatura fituese për organizmin e botërorit të vitit të ardhshëm.

Organizata “Amensty International” i ka dërguar një letër presidentit të FIFA-s, Xhiani Infantino-s duke i kërkuar që të bëhet më shumë mbi përmirësimin e kushteve të punojsëve që janë kontraktuar për ndërtimin e infrastrukturës për Botërorin e 2022-it.

Komiteti organizativ i Kupës së Botës në Katar nuk ka komentuar ende mbi protestën e Kombërtares Norvegjeze.