Në Serbi për t’u vaksinuar, qytetarë nga Shqipëria, Bosnja e Maqedonia zgjedhin Beogradin

Shtetas të huaj u dyndën të enjten drejt Serbisë pas përhapjes së fjalëve se ky vend po mundësonte vaksinime falas për të huajt, duke përdorur dozat e tepërta të “AstraZeneca”.

Arman Galiçiç ishte mes atyre që udhëtuan 600 km nga kryeqyteti i Bosnjës, Sarajevë, deri në Beograd për një injektim.

“Një shok më dërgoi një mesazh, që thoshte se kishte ardhur papritur këtu dhe se ishte pranuar dhe vaksinuar. ky informacion u përhap në Sarajevë njësoj si coronavirusi”, thotë Arman Galiçiç, shtetas boshnjak.

Shumica e atyre që i janë drejtuar qendrës së vaksinimit në Beograd janë nga vendet fqinje, përfshirë Shqipërinë, Bosnjën, Malin e Zi dhe Maqedoninë e Veriut.

Por ka edhe nga ata që kanë udhëtuar nga jashtë Ballkanit. Mjeku psikiatër Daniel Bindernagel, nga Gjermania, deklaroi se ishte përpjekur të vaksinohej në vendin e tij dhe Zvicër, por nuk kishte arritur. Ndaj i është drejtuar Serbisë.

“Jam përpjekur të vaksinohem në Zvicër dhe Gjermani, por pa sukses. Mund ta kuptoj që është pjesë e strategjisë së vaksinimit, por tani që u vaksinova në Serbi ndihem mirë”, shprehet Daniel Bindernagel, shtetas gjerman.

Serbia, me një popullsi prej rreth 7 milionë banorë, ka kuotën e dytë më të lartë të vaksinimeve në Evropë pas Britanisë, pasi ka injektuar mbi 2.1 milionë doza.

Vendi aktualisht po përdor vaksina të “Pfizer/BioNTech” dhe “AstraZeneca”, por ka urdhëruar miliona të tjera nga Kina dhe Rusia.