Kupa e Shqipërisë në futsall/ Flamurtari shpallet kampion, mposht Partizanin

Trofeu i kupës së republikës në futbollin e sallës ka shkuar në favor të Flamurtarit, i cili mposht në finalen e kompeticionit Partizanin. Kuqezinjtë zhvilluan një paraqitje perfekte, me kundërshtarin i cili po ashtu ia vështirësoi shumë gjërat.

Ndeshja e luajtur në qytetin e Durrësit regjistroi dhe një numër të konsiderueshëm tifozësh, të cilët mbështetën skuadrat e zemrës.

Ishin vlonjatët ata të cilët e nisën më mirë finalen, duke shënuar që në castet e para të fraksionit të parë edhe pse më pas kryeqytetasit kthyen gjithcka në favor të tyre pas 3 golave radhazi. Në pjesën e dytë po ashtu Partizani ishte më kërkues duke thelluar epërsinë e golave, por bregdetarët do të reagonin e madje të përmbysnin gjithcka në shifrat 9-7. Një lojë e fituar me shumë meritë, konfirmim i formës shumë të mirë që po kalon Flamurtari.

Kujtojmë se në gjysmëfinale Flamurtari mposhti gjithashtu Tiranën, ndërsa në anën tjetër Partizani kaloi pengesën Vllazni. Tanimë me këtë trofe që i erdhi fundi, ekipet do të përqendrohen në kampionat, aty ku vlonjatët i pret sërish skuadra bardheblu, ndërsa Partizani luan me shkodranët e Vllaznisë.

LEXONI GJITHASHTU: 

• Rama nesër në Turqi, takohet me Erdogan
• Greva e fermerëve grekë, bllokohet lëvizja e automjeteve të rënda në Kakavijë