“Lëvizje e gabuar”- Kina kritikon SHBA për Gazën

Kina ka kritikuar ashpër Shtetet e Bashkuara për vendosjen e vetos në Këshillin e Sigurimit të OKB-së ndaj rezolutës që kërkonte një armëpushim të menjëhershëm në Gaza.

Pekini zyrtar deklaroi se lëvizja dërgon mesazhin e gabuar dhe i jep dritën e gjelbër vazhdimit të kasaphanës.

Por nga ana e saj, Shtetet e Bashkuara deklaruan se rezoluta e propozuar nga Algjeria do të vinte në rrezik bisedimet për t’i dhënë fund luftës.

Shtetet e Bashkuara kishin propozuar rezolutën e tyre për një armëpushim të përkohshëm, që gjithashtu paralajmëronte Izraelin të mos pushtojë qytetin e Rafahut.

Vendimi i Uashingtonit është dënuar gjerësisht, pasi luftimet në Gaza vazhdojnë. Rezoluta u mbështet nga 13 nga 15 vende të Këshillit të Sigurimit, me Mbretërinë e Bashkuar që abstenoi.

Duke reaguar ndaj vetos, ambasadori i OKB-së në Kinë, Zhang Jun tha se pretendimet e Shteteve të Bashkuara se votimi do të ndërhynte në negociatat diplomatike ishin “tërësisht të pabesueshme”.

Ndërsa kryediplomati algjerian deklaroi se, “fatkeqësisht Këshilli i Sigurimit dështoi sërish”. “Analizoni ndërgjegjen tuaj për mënyrën se si do t’ju gjykojë historia”, deklaroi Amar Bendjama.

Edhe aleatët e SHBA kritikuan lëvizjen. I dërguari i Francës, Nicolas de Riviere, shprehu keqardhjen që rezoluta nuk ishte miratuar duke parë “situatën katastrofike në terren”.