Përplasja me armë zjarri në fshatin Bardhaj të Shkodrës, policia arreston dy vëllezërit Doçi

Policia e Shkodrës ka arrestuar dy vëllezërit Marjan dhe Hot Doçi që mbetën të plagosur mbrëmjen e djeshme gjatë një konflikti me armë zjarri në fshatin Bardhaj.

Ndërkohë, Policia ka shpallur në kërkim 29-vjeçarin Besmir Perkolaj,  i cili akuzohet se ka plagosur me armë zjarri dy të rinjtë.

Policia sqaron se ditën e djeshme rreth orës 19:30 në fshatin Bardhaj gjatë një konflikti për motive të dobëta, Marjan dhe Hot Doçi kanë qëlluar me armë zjarri në drejtim të Besmir Perkolës, i cili iu kundërpërgjigj duke qëlluar me armë zjarri automatik,  ku për pasojë mbetën të plagosur jashtë rrezikut për jetën dy vëllezërit.

Në vendin e ngjarjes janë sekuestruar prova materiale që shërbejnë për dokumentimin e plotë të ngjarjes si dhe mjetin tip Audi të Marjan Doçit.

Ndaj dy vëllezërve rëndojnë veprat penale “Vrasje me paramendim, e kryer në bashkëpunim, mbetur në tentativë”, si dhe “Mbajtje pa leje të armëve dhe municioneve luftarake”.

Ndërsa mbi Besmir Perkolajn rëndojnë veprat penale “Vrasje në rrethana cilësuese, e mbetur në tentativë”, dhe “Mbajtje pa leje të armëve dhe municioneve luftarake”.