“Tunelet e terrorit”- Izraeli nuk tërhiqet nga plani për pushtimin e Rafahut

Ushtria izraelite ka deklaruar se ka zbuluar një tjetër rrjet nëntokësor, që i quan “tunelet e terrorit” e që lidh veriun me jugun e Rripit të Gazës. Një nga objektivat kryesorë të ofensivës izraelite ishte shkatërrimi i rrjeteve që sipas shtetit hebre, përdoren nga Hamas për të lëvizur luftëtarë dhe armë.

Me Izraelin që ruan qëndrimin e tij për një pushtim të afërt të Rafahut në kërkim të militantëve, Gjysmëhëna e Kuqe Palestineze ka arritur ndërkohë të evakuojë 24 persona nga spitali i tejmbushur “Al Amal” në afërsi të qytetit Khan Junis.

Ushtria izraelite i ka prezantuar kabinetit të luftës një plan për evakuimin e popullsisë nga zonat e luftës, pavarësisht thirrjeve ndërkombëtare për ta anuluar operacionin.

Në frontin politik, kryeministri palestinez Mohammed Shtajeh ka dhënë dorëheqjen bashkë me kabinetin e tij, që qeveris disa zona të Bregut të pushtuar Perëndimor.

Presidenti Mahmoud Abbas ka pranuar vendimin e tij. Dorëheqja e kryeministrit sinjalizon gatishmërinë e lidershipit palestinez të mbështetur nga Perëndimi për të pranuar reformat për të qeverisur Gazën pasi lufta të ketë përfunduar.