Nesër inaugurohet baza e Kuçovës, Komandanti Dimo: Kemi dislokuar dronë, ja plani

Gjeneral Brigate Ferdinant Dimo, Komandant i Forcës Ajrore, është shprehur se inaugurimi i bazës ushtarake të Kuçovës gjatë ditës së nesërme, është krenari e gjithë shqiptarëve.

Komentet Dimo i bëri në një lidhje për Euronews Albania, ku tha se baza e Kuçovës përmbush parametrat e bazave të tjera taktike të NATO-s.

Ai tha gjithashtu se momentalisht janë dislokuar në bazë një numër i caktuar dronës dhe shumë shpejt sipas tij, pritet që të instalohen raketë të mbrojtjes kundërajrore me bazë në tokë dhe sistemet anti-dron.

“Jemi në momentet e fundit dhe mendojmë se gjithçka e kemi përgatitur sipas standarteve të kërkuara. Ka qenë një punë në vijimësi që nuk ka nisur sot dhe që do të jetë e vijueshme në modernizimin e infrastrukturës dhe sistemeve të pajisjeve.

Krenaria e ditës së nesërme është krenari e të gjithë shqiptarëve. Qeveria shqiptare dhe NATO kanë bërë maksimalisht mirë për të instaluar një bazë ushtarake në Kuçovë, që plotëson të gjitha standartet. Rëndësia e kësaj baze është jo vetëm në aspektin e një baze ushtarake në Shqipëri, por ka një rëndësi të jashtëzakonshme përmes mesazhit që transmetohet përmes saj, lidhur me sigurinë në Ballkanit Perëndimor.

Baza taktike e NATO-s plotëson të gjitha parametrat si bazat e tjera taktike në Europë. Kjo bazë sot nga ana infrastrukturore plotëson të gjitha kriteret e vendosura nga NATO. Ne kemi tashmë të dislokuar një numër dronësh, që kanë misionin e tyre.

Shumë shpejtë në këtë bazë do të instalohen sistemet e mbrojtjes kundërajrore me bazë në tokë dhe brenda një kohe të shkurtër edhe sistemet anti-dronë të instaluar në këtë bazë. Sistemi i dronëve sot është i instaluar në këtë bazë dhe janë parë të gjitha veçoritë e tyre”, tha Dimo.

LEXONI GJITHASHTU:

• Rama publikon pamje nga baza e NATO-s në Kuçovë
• Përgatitjet drejt përfundimit, gati baza ajrore taktike e NATO-s në Kuçovë