Gara për 25 prillin, listat e hapura kanë krijuar rivalitet mes kandidatëve në fushatë

Ndryshimet në kodin zgjedhor që mundësuan hapjen pjesërisht të listave në zgjedhje, kanë nxjerr në pah një rivalitet mes kandidatëve për të kërkuar votë perferenciale në zgjedhjet parlamentare të 25 prillit.

Pas zyrtarizmit të listave më 8 mars, kandidatët, jo vetëm në terren, por edhe përmes rrjeteve sociale kanë nisur fushatën për të kërkuar votën e qytetarëve për numrin që mbajnë në qarkun ku kandidojnë.

Tek socialistët që janë në kërkim të një mandati të tretë, vihet re një rivalitet edhe më i fortë. Mjafton të vëzhgosh në faqet e tyre në rrjetet sociale për të vënë re detajet e fushatës që po realizojnë.

Një tjetër element që mbizotëron është fakti se fushatë intensive po realizohet edhe nga kandidatët që ndodhen në listë jo të sigurt.

Ministri Pandeli Majko, deputetët Mimi Kodheli, Eljo Hysko  janë ndër kandidatët më të spikatur  të socialistëve që edhe përmes faqes së tyre në Facebook kërkojnë nga qytetarët që t’i votojnë në zgjedhje.

Ndërkohë, në kampin tjetër atë të Partisë Demokratike, kjo garë është më e qetë. Të vetmit që shihen të realizojnë fushatë për të kërkuar votën preferenciale janë aleatët e demokratëve, ndër ta edhe Fatmir Mediu.