Linja ajrore Prishtinë-Beograd, Haradinaj: Marrëveshja avancim për Kosovën, por taksa 100% nuk hiqet

Kryeministri në detyrë i Kosovës, Ramush Haradinaj, e vlerësoi si hap përpara marrëveshjen për funksionalizimin e linjës ajrore Prishtinë-Beograd.

Ai falënderoi ambasadorin amerikan në Berlin, Richard Grenell, për angazhimin e tij në nënshkrimin e letrës së qëllimit, përmes së cilës Kosova shprehet e gatshme për funksionalizimin e kësaj linje.

Haradinaj tha se në këtë “letër të qëllimit” Kosova është bashkë-palë me NATO-n, e cila përmes Hungarisë kontrollon hapësirën ajrore mbi territorin e Kosovës.

Sipas tij, një marrëveshje e tillë nuk e cenon sovranitetin e as shtetësinë e Kosovës, duke shtuar se gjuha e përdorur në dokumentin e nënshkruar është “gjuhë e NATO-s”.

I pyetur se çfarë dokumentesh do përdorin pasagjerët e kësaj linje, Haradinaj nuk përjashtoi mundësinë e përdorimit të pasaportës së Kosovës si mjet udhëtimi.

Kryeministri në detyrë, theksoi se kjo marrëveshje nuk e konteston taksën 100 për qind, që Qeveria e udhëhequr prej tij i ka vënë mallrave nga Serbia.

“Nuk vendosim taksa shtesë përpos atyre që i ka aeroporti, pra i japin status të barabartë udhëtarëve nga Prishtina në Beograd dhe nga Beogradi në Prishtinë pa asnjë diskriminim. Kjo nuk ka të bëjë me taksën 100 për qind”, – u shpreh kryeministri në detyrë i Kosovës.

Në fund, ai përjashtoi mundësinë e përfshirjes në një koalicion me Lëvizjen Vetëvendosje, duke e quajtur Albin Kurtin “mashtrues” sërish.

Megjithatë, Haradinaj tha se është kundër opsionit për zgjedhje të reja, pasi, sipas tij, duhet të jetësohet rezultati i zgjedhjeve të 6 tetorit, të cilat i vlerësoi lartë.