I gjetën 22 kg kanabis në shtëpi, bie në pranga 48-vjeçari në Korçë (Emri)

Florand Xhabej, 48 vjeç është arrestuar këtë të shtunë në Korçë në kuadër të operacionit antidrogë të koduar “Big Circles”.

Arrestimi i tij u bë i mudnur pasi policia kishte marrë informacionin se 48-vjeçari posedonte në banesë lëndë narkotike me qëllim shitjen e saj.

Sipas njoftimit të policisë, gjatë kontrollit të bërë në banesë atij i janë sekuestruar 22 kg lëndë e dyshuar narkotike cannabis sativa, 1 automjet dhe 1 celular.

Njoftimi i policisë:

Specialistët e Seksionit për Hetimin e Narkotikëve të DVP Korçë, në vazhdën e operacioneve të njëpasnjëshme për goditjen e veprimtarisë kriminale të shitjes së lëndëve narkotike, organizuan dhe finalizuan operacionin policor të koduar “Big Circles”, si rezultat i të cilit u arrestua në flagrancë shtetasi:

-F. Xh., 48 vjeç, banues në fshatin Vashtëmi, Korçë.

Në bazë të informacioneve të siguruara nga inteligjenca policore, se ky shtetas ushtronte veprimtarinë e paligjshme të prodhimit e shitjes së narkotikëve, shërbimet e Policisë organizuan punën me qëllim lokalizimin e tij. Gjatë kontrollit të ushtruar në banesën e tij, në fshatin Vashtëmi, u gjetën 22 kg lënde e dyshuar narkotike cannabis sativa, e ndarë në pako. Sasia e lëndës narkotike së bashku me 1 automjet dhe 1 celular u sekuestruan në cilësinë e provës materiale.

Në bashkëpunim me Prokurorinë, po vijojnë hetimet për dokumentimin e plotë të këtij rasti dhe për vënien përpara përgjegjësisë ligjore të shtetasve të tjerë të implikuar në këtë veprimtari kriminale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.