Andrew Tate dhe i vëllai dalin nga burgu, avokatët: Krimet, mbi 10 vjet më parë

Në Rumani gjykata ka vendosur lirimin nga burgu të Andrew dhe Tristan Tate, të cilët u arrestuan për llogari të drejtësisë Britanike. Ata akuzohen për 4 raste dhune dhe sulm seksual në Britani të Madhe disa vite më parë.

“Unë dua t’i jap meritë absolute drejtësisë rumune për marrjen e vendimit të duhur sot.

Ne jemi njerëz shumë të pafajshëm dhe me kalimin e kohës të gjithë do ta shohin këtë dhe ne jemi shumë të emocionuar për të përfunduar këtë proces gjyqësor që këtu e tutje”, tha Tate.

Pas një seance gjyqësore një orëshe, gjyqtarët vendosën që të dy vëllezërit, Andrew dhe Tristan Tate duhet të lirohen menjëherë nga paraburgimi. Megjithatë, kjo nuk nënkupton fundin e telasheve të tyre ligjore. Gjykata vendosi që ata të arrestohen sërish pas përfundimit të gjyqit në Rumani.

“Me sa dimë, hetimi ishte mbyllur tashmë, nuk e dimë nëse ky hetim është rihapur, nëse ka ndonjë provë të re të paraqitur nga autoritetet.

Ishte pak para mesnatës, policia erdhi duke trokitur në derën e Andrew dhe Tristan Tate. Të dy vëllezërit u shoqëruan në prokurori, ku u njoftuan për akuzat e ngritura ndaj tyre: vepra seksuale dhe shfrytëzim të njerëzve në territorin e Mbretërisë së Bashkuar. Menjëherë pas kësaj, të dy u arrestuan dhe kaluan pjesën tjetër të natës në burg”, tha Eugen Vidineac, avokat i Andrew dhe Tristan Tate.

Në sallën e gjyqit, Andrew dhe Tristan Tate pretenduan se duan të qëndrojnë në Rumani dhe kjo për të vërtetuar pafajësinë e tyre në çështjen e ngritur tashmë kundër tyre nga hetuesit rumunë. Ata thanë gjithashtu se, pasi të përfundojë shtegu këtu, në Rumani, ata do të rezervojnë një fluturim dhe do të shkojnë në Mbretërinë e Bashkuar për të luftuar akuzat e ngritura atje.

“Është shumë qesharake sepse i kam kërkuar gjykatave rumune të shkoj vetë në MB. Kam pyetur pesë herë dhe jam refuzuar. Kështu që tani duhet të shkoj në shtëpi. Është një lajm fantastik”, tha Andrew Tate.

“Unë thashë jo, dua të qëndroj këtu dhe të përballem me drejtësinë”, tha Tristan Tate.

Avokatët e Andrew dhe Tristan Tate pretendojnë se krimet në fjalë thuhet se janë kryer mbi 10 vjet më parë dhe argumentuan se urdhërarresti duhet të hiqet.

LEXONI GJITHASHTU:

• Refuzohet kërkesa e Andrew Tate për ta vizituar nënën e sëmurë në Britani
• Andrew Tate arrestohet në Rumani me kërkesë të autoriteteve britanike