A kanë hapësirë të rinjtë për t’u përfshirë në politikë? Ervin Bushati i përgjigjet aktivistes

Gjatë emisionit “Rinvote”, Diana Mjeshtri, aktiviste, pyeti kandidatin për deputet nga Partia Socialiste, Ervin Bushati se sa mundësi u jepet të rinjve që të bëjnë karrierë në PS dhe sa janë të përfaqësuar në listën e kandidatëve në zgjedhjet e 25 prillit.

Z. Bushati tha se PS kandidon në disa qarqe të rinj që janë për herë të parë në politikë dhe përzgjedhja e tyre është bërë përmes aplikimeve në platformën “Deputeti që duam”.

Deputeti socialist u shpreh se në këtë platformë ka pasur rreth 1500 aplikime për të arritur në fund në përzgjedhjen e disa prej tyre që janë përfshirë në të gjitha qarqet e vendit.

Aktivistja tha se mënyra e përzgjedhjes është e gabuar pasi të jesh deputet nuk është një punë ku mund të aplikosh por e cilësoi atë detyrë si një mision.

Gjithashtu, Diana Mjeshtri theksoi se një pjesë e mirë e të rinjve që kandidohen në listën e PS janë të renditur në fund të listës.

Por, sipas z. Bushati PS është e vetmja parti që përfshin të rinjë duke theksuar se kanë “rinovuar me 50% listën, ndërsa PD ka pothuajse të njëjtën listë me 2017”.

Sa i takon renditjes së pafavorshme, ai tha se gara është me listë të hapur dhe renditja mund të përmbyset.

Deputeti socialist përmendi edhe traditën e kandidimit të kryetarëve të FRESSH, por që në këtë pikë aktivistja kundërshtoi duke thënë se emri i tij këtë herë është thuajse në fund të listës së Tiranës.

Ervin Bushati gjithashtu rikujtoi se PS është partia që i ka dhënë Shqipërisë edhe kryeministra nën 30 vjeç.