Putin feston fitoren në zgjedhje dhe 10-vjetorin e pushtimit të Krimesë 

Presidenti rus Vladimir Putin ka mbërritur në Sheshin e Kuq në Moskë me rastin e 10-vjetorit të pushtimit të paligjshëm i Krimesë nga Rusia, raporton BBC.

Siç thuhet në raportin e shërbimit publik britanik, një numër i madh njerëzish u mblodhën në shesh për të festuar fitoren e Putinit në zgjedhjet presidenciale të përfunduara së fundmi.

Krimea është quajtur shpesh një “aeroplanmbajtëse e pambytshme”, tha Putin, duke shtuar se tani “është kthyer në portin e saj të origjinës”.

“Krimea nuk është vetëm një territor i rëndësishëm strategjik, jo vetëm historia jonë, tradita jonë dhe krenaria e Rusisë. Krimea, mbi të gjitha, është populli. Populli i Sevastopolit dhe Krimesë, ata janë krenaria jonë”, tha Putin.

Putin më pas përshkroi Donbassin dhe pjesë të tjera të Ukrainës që aktualisht janë të pushtuara nga forcat ruse si pjesë e “Rusisë së Re”, raporton BBC.