Meliza Haradinaj-Stublla jep dorëheqjen nga posti i ministres së Jashtme dhe nga AAK-ja

Ministrja në detyrë e Punëve të Jashtme e Kosovës, Meliza Haradinaj-Stublla ka dhënë dorëheqjen nga posti i ministres dhe gjitha funksionet në partinë Aleanca për Ardhmërinë e Kosovës (AAK) dhe anëtarësia.

Haradinaj-Stublla thotë se dorëheqja erdhi për shkak të njollosjes, linçimit e manipulimit dhe shantazhit ndaj familjes së saj.

Vendimin e dorëheqjes e ka dhënë vetë Haradinaj-Stublla përmes një postimi në Facebook, ku kërkon nga prokuroria të hetojë video-përgjimin sipas të cilit bashkëshorti i saj akuzohet për blerje votash.

“Distancimi im nga një parti tek e cila kam besuar fort dhe kontribuar shumë, mbi 15 vjet, nuk e kam menduar asnjëherë që do të vijë. Por tani që erdhi, jam në paqe që po largohem nga prezenca toksike e disa njerëzve që AAK-në e bëjnë parti të pareformueshme, dhe kryetarin Haradinaj të izoluar.

Siç kam kërkuar edhe më herët, RIPËRSËRIS që në interval sa më të shkurtër kohor, Prokuroria e Shtetit të ndriçojë para së gjithash vërtetësinë e video-inskenimit të plasuar në mënyrë të dyshimtë në pseudo-portale dhe faktimin e vërtetësisë së të gjitha pretendimeve që implikojnë familjen time dhe mua”, shkruan mes të tjerash Haradinaj-Stublla.