Qeveria bën gati statusin e dëshmorit për Arjan Salën

U deshën 4 ditë luftë me flakët në magazinën e qendrës tregtare “Casa Italia” për të nxjerrë prej andej trupin e pajetë të punonjësit të sigurisë Arjan Sala. Qeveria ka gati statusin dëshmor i atdheut për 32-vjeçarin që preku mbarë opinionin publik me aktin e tij heroik.

Ankthi për familjen Sala përfundoi tragjikisht mëngjesin e kësaj të shtune, ku rreth orës 3, forcat e kërkimit dhe zjarrëfikseve gjetën trupin e pajetë të 32-vjeçarit. Në kërkime, u përfshi edhe xhaxhai i tij ndërsa Arjan Sala u gjet në një nga dhomat e magazinës i mbuluar me rroba që mendohet ti ketë lagur me ujë.

Për këtë arsye ai ishte djegur thuajse vetëm në gjymtyrët e poshtme. Punonjësi i sigurisë baba i një fëmije 2 vjeç, dyshohet se humbi jetën për shkak të asfiksisë ndërsa pranë trupit u gjetën dy fikëse zjarri portative me të cilat ka tentuar të shuajë flakët.

Pas ekzaminimit në morgun e Tiranës në mesditë trupi i pajetë i Arjan Salës u dërgua në banesën e tij, ku iu bënë homazhet. Për ngushëllim në familjen Sala, shkoi edhe President ii Republikës Ilir Meta.

Reagimet në rrjetet sociale për heroin Arjan Sala që shpëtoi disa punëtor ishin të shumta ndërsa  zv. ministri i Mbrojtjes Petro Koçi dha lajmin se Komisioni Qendror i Statusit “Dëshmori i Atdheut” “me porosi te Kryeministrit është gati për t’i dhënë titullin shtetasit heroik Arjan Sala, por po pritet përfundimi i shpejte i ekspertizës ligjore dhe propozimi i Prefektit të Tiranës për të marrë vendim të menjëhershëm.

Qendra tregtare ku punonte i riu u përfshi nga flakët pasditen e së mërkurës, ndërsa flakët u vunë nën kontroll pas tre ditës. Nga hetimet paraprake dyshohet se qendra tregtare u përfshi nga flakët për shkak të një shkëndije elektrike.