Aplikimet për naftë i fermerëve në Maliq, mungesa e sistemit krijon radhë

Mungesa e sistemit për procesin e aplikimeve për naftë në bashkinë e Maliqit ka detyruar fermerët të presin gjatë në sportelet e kësaj bashkie.

Pjesa më e madhe e atyre që presin për të aplikuar janë të moshuar, përfshi dhe gra. Ata shprehen se e kanë të pamundur të aplikojnë vetë në platformën online ndaj pranojnë të qëndrojnë gjatë në radhë për të kryer këtë aplikim.

“Nuk ka sistem. Kam që në orën 9 këtu e nuk ka sistem, nuk nxjerrin asgjë. Të rinohem e një herë që të përdor celularin, kush merr vesh t’i bëjë? Privati do 10 mijë t’i bëjë, ndaj rrimë në radhë, kur të na vijë radha”, thotë një i moshuar.

“Kam 20 dynym tokë, për misër. Varet sipas çmimit të naftës që është sot. Këtu na urdhëruan, për në bashki dhe erdhëm këtu”, shprehet një tjetër.

Një tjetër problem i ngritur nga fermerët potenciale dhe superpotencialë është dhe fakti se ata do të përfitojnë 100% nga skema mbështetëse vetëm për 10 hektarë, ndërsa për sipërfaqet e tjera vetëm 50% të saj, fakt që pranohet dhe nga drejtori i drejtorisë rajonale të ekstensionit bujqësor Korçë.

“Të gjithë ata fermerë të cilët janë potencialë dhe kanë mundësinë e aplikimit individualisht do të marrin 100% mbështetje për 10 hektarë dhe mbi 10 hektarë do të marrin 50% të naftës. Iu bëj thirrje të bëhen grup fermerësh, të jenë mbi 7 fermerë dhe të përfitojnë 100%. Fermerë të cilët që kanë mbi 150 hektarë tokë e kanë mundësinë e aplikimit individualisht, unë iu bëj thirrje të bashkohen”, thotë Vullent Gjolla, drejtori i Drejtorisë Rajonale të Ekstensionit Bujqësor, Korçë.

Në bashkinë e Maliqit pritet të aplikojnë me shume se 6000 fermerë, të cilët kultivojnë kultura të ndryshme bujqësore.

LEXONI GJITHASHTU:

• E rëndë| Gjendet pa jetë në kanal një 60-vjeçar në Maliq, çfarë dyshohet
• Karnavalet e Pojanit në Maliq, festa tradicionale ka si qëllim ruajtjen e traditës