Zgjedhjet e 25 prillit, Meta: Them referendum sepse është në pikëpyetje e ardhmja e Shqipërisë

Zgjedhjet e 25 prillit janë referendum, pasi është në pikëpyetje e ardhmja e Shqipërisë. Kështu deklaroi nga Fieri sot, Presidenti Ilir Meta teksa u bëri thirrje qytetarëve për pjesëmarrje masive ne zgjedhje.

“[…] padyshim shumë [vendi ka] sfida përpara. Është e rëndësishme gjithashtu të vlerësojmë rëndësinë e pjesëmarrjes së gjithë qytetarëve shqiptarë në zgjedhjet e  25 prillit,” – u shpreh Meta.

Sipas tij e gjithë Evropa pret me vëmendje mbarëvajtjen e zgjedhjeve për të marrë vendimin e ardhshëm për çeljen e mundshme të negociatave, sepse “e dimë që zgjedhjet sipas standardeve të dosjeve të Shijakut dhe të Dibrës kanë mbajtur peng integrimin evropian të vendit”.

“[…] mosndëshkimi dhe mos hetimi i krimeve elektorale të ndodhura dhe të denoncuara në mënyrë të shpejtë dhe në mënyrë pro aktive dhe të plotë.  Jam shumë i bindur se të gjithë e kanë kuptuar rëndësinë që ka ndërgjegjësimi i çdo qytetari. Vota e qytetarit është fuqia e vërtetë në demokraci dhe këtë fuqi duhet ta respektojë dhe këtë fuqi jam i bindur se do ta tregojnë të gjithë  më 25 prill,” – shtoi më tej Presidenti.