”Drejtësi për Maradonën”, me qindra argjentinas në protestë, po hetohet vdekja e legjendës së futbollit

Me qindra argjentinas pushtuan rrugët e Buenos Aires duke kërkuar drejtësi për vdekjen e legjendës së futbollit Diego Maradona.

Argjentinasit vendosën të protestojnë ndërsa ekspertët janë duke hetuar se çfarë e shkaktoi vdekjen e Maradonës. Nën hetim janë tre mjekë, dy infermierë dhe staf tjetër mjekësor të akuzuar për neglizhencë.  

“Ai nuk vdiq atë e vranë”, “Drejtësi për Maradonën” ishin disa nga thirrjet e argjentinasve që mbanin në duar flamuj dhe këndonin.

Zemërimi i protestuesve nisi pas publikimit të një dokumentari ku u bënë me dije regjistrimet audio të thirrjeve telefonike mes mjekëve të ish-futbollistit dhe stafit të tij. Mes demonstruesve ishin edhe familjarë të Maradonës.

Maradona vlerësohet si një nga yjet më të mëdhenj të futbollit dhe madje në vendin e tij ai cilësohet Zot, pavarësisht betejave të gjata me varësinë nga droga dhe alkooli.

Paneli i ekspertëve, i përbërë nga dhjetë specialistë zyrtarë dhe dhjetë persona të tjerë të zgjedhur nga palët e interesuara, pritet të bëjnë publike rezultatet e hetimeve brenda dy ose tre javësh duke hedhur drite mbi atë se çfarë ndodhi me legjendën e fushës së blertë.