Deri tani 78 mijë injektime, vijon në ditën e dytë vaksinimi masiv në sheshin “Skënderbej”

Në Shqipëri vijon vaksinimi masiv, proces që ditën e djeshme u mbyll me 11 mijë e 478 vaksinime në të gjithë vendin. Ministrja e Shëndetësisë, Ogerta Manastirliu ka deklaruar se deri tani janë kryer mbi 78 mijë vaksinime.

Do të vijohet më tej me vaksinimet e mësuesve, por edhe atë masiv të grupmoshës mbi 70 vjeç. Ministrja u është drejtuar me një apel të veçante të moshuarve që kërkojnë të dine se kur do të vaksinohen, të kontaktojnë me mjekun e familjes.

Gazetarja e Euronews Albania, Eksiola Shehu raportoi se vaksinimi nuk ka nisur në orën, 9:00 siç ishte paralajmëruar, teksa dhjetëra të moshuar kanë pritur që të nisin regjistrimin.

“Dje procesi i vaksinimit ka vijuar deri në orët e pasdites, të moshuarit janë lajmëruar nga mjeku i familjes dhe janë paraqitur në sheshin ‘Skënderbej’ për t’u regjistruar. Doza e dytë e vaksinës kineze bëhet 4 javë pas dozës së parë”, tha gazetarja e Euronews Albania.