Goditën me grushte një 40-vjeçar, tre të arrestuar në Gramsh

Tre persona në Gramsh kanë përfunduar në prangat e policisë, pasi goditën me grushte një 40-vjeçar.

Policia tha se pas marrjes së njoftimit se në lagjen “Holta”, Gramsh, gjatë një konflikti për motive të dobëta ishte dëmtuar një 40-vjeçar, kanë organizuar punën për identifikimin, kapjen dhe nxjerrjen përpara përgjegjësisë ligjore të shtetasve të përfshirë në konflikt.

“Si rezultat i veprimeve hetimore dhe procedurale të kryera nga specialistët për Hetimin e Krimeve të Komisariatit të Policisë Gramsh u bë identifikimi, kapja dhe arrestimi i shtetasve E. B., 21 vjeç dhe Xh. B., 22 vjeç, të dy banues në Gramsh. Nga veprimet hetimore dyshohet se këta shtetas, më datë 06.04.2024, rreth orës 23:30, gjatë një konflikti për motive të dobëta, kanë goditur me grushte shtetasin E. M., 40 vjeç, banues në Gramsh, i cili vijon të jetë në kujdesin e mjekëve. Gjatë kontrollit në banesën e shtetasit E. B., shërbimet e Policisë kanë gjetur dhe sekuestruar një përforcues grushti”, bëri me dije policia.

Në vijim të veprimeve procedurale për këtë rast u arrestua edhe shtetasi Xh. K., 31 vjeç, banues në Gramsh, pasi dyshohet se ka pasur dijeni për këtë rast dhe nuk ka njoftuar organet ligjzbatuese.

LEXONI GJITHASHTU:

• Fshati në Gramsh pa shkollë, 10 nxënësit e vetëm udhëtojnë 2 km për të mësuar
• Konsumoi mbidozë ilaçesh, përfundon në spital 29-vjeçarja nga Gramshi