Salianji: Kam prova shkencore se denoncimi për Agron Xhafën është 100% i vërtetë

Deputeti i Partisë Demokratike, Ervin Salianji, është shprehur se ka prova shkencore se denoncimi i bërë nga ai për Agron Xhafën, vëllain e ish-ministrit të Brendshëm, Fatmir Xhafajt, është 100% i vërtetë.

Komentet Salianji i bëri jashtë ambienteve të Gjykatës së Apelit në Tiranë, ku ishte parashikuar seanca gjyqësore ndaj tij, e cila u shty.

Salianji është dënuar me 1 vit burg për “shpifje” nga Gjykata e Shkallës së Parë, pas denoncimit përmes videos “Babale”.

“Është një çështje që ka ardhur në apel, ashtu si edhe në Gjykatën e Shkallës së Parë si kallëzim i trafikantit të drogës, Geron, apo Agron Xhafaj.

Prokuroria ka detyrën që të vërtetojë fajësinë. Ne kemi prova shkencore sesi është 100 % i vërtetë i gjithë denoncimi i kryer nga unë dhe si institucionet e shtetit shqiptar kanë shmangur hetimin ndaj ish ministrit dhe vëllait të tij dhe sesi e ka shmangur komplet hetimin pasuror ndaj tij përmes ligjit antimafia, që ish-ministri të vijonte karrierën politike, por edhe bizneset, siç e keni parë nga akuzat për kate pa leje apo shumëkatëshe në qendër të Tiranës.

Unë s’jam marrë me sulme personale ndaj gjykatës apo gjyqtarëve, pavarësisht se të gjithë gjyqtarët që kanë marrë vendim në Shkallën e Parë janë shkarkuar nga vettingu. Gjermeni është në përgjimet e Prokurorisë Italiane. Këta janë personazhe që kontrollohen nga grupet kriminale dhe mendojnë se do më mbyllin gojën mua ndaj denoncimeve. Unë denoncoj, trafikanti shkon në burg, ndërkohë vijon hetimi ndaj meje”, tha Salianji.

LEXONI GJITHASHTU:

• “Babale”| Shtyhet gjyqi në Apel ndaj Salianjit, data kur do mbahet seanca e radhës
• Mblidhet Komisioni Hetimor i “TIMS”, Salianji: Synon kontrollin e zbatimit të ligjit