Rusia dërgon instruktorë ushtarakë në Niger

Rusia ka dërguar instruktorë ushtarakë në Niger, raportoi të enjten televizioni shtetëror i Nigerit, RTN.

Sipas RTN-së, instruktorët ushtarakë rusë mbërritën me një avion të mbushur me pajisje ushtarake, në bazë të një marrëveshjeje mes juntës dhe presidentit rus, Vladimir Putin, për ta rritur bashkëpunimin.

Televizioni publikoi pamje të një avioni ushtarak duke shkarkuar pajisje ushtarake më 10 prill. Një burrë në uniformë kamuflazh, për të cilin RTN tha se ishte njëri prej instruktorëve, tha se shkuan atje për ta stërvitur ushtrinë e Nigerit dhe për të zhvilluar bashkëpunim ushtarak mes Rusisë dhe Nigerit.

RTN raportoi gjithashtu se Rusia është pajtuar për ta vendosur një sistem kundërajror në Niger.

Deri para grusht shtetit ushtarak në korrik të vitit të kaluar, Nigeri ishte aleati i fundit demokratik i Shteteve të Bashkuara, Francës dhe vendeve të tjera evropiane në luftën kundër militantëve islamistë në rajonin e Sahelit, ku xhihadistët po vazhdojnë ta rrisin ndikimin, shkruan REL.

Në mars, junta i dha fund bashkëpunimit me Shtetet e Bashkuara në luftën kundër terrorizmit. Forcat e Armatosura të Gjermanisë kanë një bazë ajrore në Niami, e ardhmja e të cilës është e paqartë tani.

LEXONI GJITHASHTU:

• Rusia akuzon forcat speciale britanike se po operojnë në Ukrainë
• Përplasen me armë me FSB-në, vriten të dyshuarit për terrorizëm në Rusi