Javën e ardhshme kryeministri Rama në Bruksel, temat kryesore: Konferenca e donatorëve dhe procesi i anëtarësimit

Këshilli i Ministrave të Bashkimit Evropian mblidhet për herë të parë ditën e martë më 28 janar ku presidenca kroate do të shpalosë përparësitë e saj për gjashtëmujorin në krye të Unionit.

Kroatët kanë një qasje pozitive për celjen e negociatave për Shqipërinë dhe Maqedoninë e Veriut.

Tema e zgjerimit do të jetë një prej temave që do të diskutohen nën kapitullin “Një Evropë më e fortë në botë”. 

Të martën në Bruksel do të zhvillohet Këshilli i parë për këtë vit i Ministrave të BE-së për çështjet e përgjithshme, në të cilin Presidenca kroate do të paraqesë përparësitë për gjashtë muajt e ardhshëm në krye të Unionit.

Plani i deritanishëm është arritja e një ekuilibri për të bindur vendet dyshuese me metodologjinë e re, duke shtuar vlerësimin e ecurisë së reformave deri sot, pas propozimeve dhe raportit të ndërmjetëm në muajin shkurt nga Komisioni Evropian.

Në Bruksel të martën do të jetë në një vizitë zyrtare edhe Kryeministri Edi Rama, i cili do të pritet në një darkë pune nga Presidentja e Komisionit Ursula von der Leyen.

Temat e pritshme të diskutimit do të jenë Konferenca e donatorëve e 17 shkurtit dhe ecuria e procesit të zgjerimit. Po ashtu për të folur mbi konferencën e donatorëve mbi tërmetin, kryeminsitri, sic e lajmëroi edhe nga Roma, këtë javë do të takojë kancelaren gjermane Angela Merkel.

Ndërkohë të mërkurën, në 29 janar, kreu i qeverisë viziton zyrat qëndrore të NATOs ku do të takohet me sekretarin e përgjithshëm, Jens Stoltenberg.

Nën cilësinë e kryetarit të presidencës së OSBE, Kryeministri shqiptar do të marrë pjesë në Këshillin e Atlantikut të Veriut.