Mbërrijnë sot 38.400 doza të ‘AstraZeneca’ teksa në botë shtohet skepticizmi mbi përdorimin e saj

Sot pritet të mbërrijnë në Shqipëri dozat e para të vaksinës “AstraZeneca“.

Sipas njoftimit të kryeministrit Rama disa ditë më parë, janë 38.400 doza që priten të vijnë dhe me të cilat mendohet të nisë vaksinimi i mësuesve.

Kjo dërgesë vjen në një kohë kur ‘AstraZeneca’ po përballet me dyshime për efekte anësore te personat që e marrin këtë vaksinë.

Vaksina ‘AstraZeneca’ vijon të shkaktojë shqetësime pasi disa vende regjistruan vdekje të pacientëve që kishin marrë dozën e saj.

Vende si Danimarka, Norvegjia dhe Islanda pezulluan përdorimin e vaksinës për të zbuluar nëse vaksina kishte ndikime.

Tajlanda ishte shteti i fundit që vendosi të shtyjë përdorimin e vaksinës ‘AstraZeneca’, duke iu bashkuar kështu një sërë shtetesh europiane që kanë ndërmarrë një gjë të tillë si pasojë e raportimit të disa rasteve të mpiksjes së gjakut tek të vaksinuarit.